События

Почта хезмәте ветераннары Габдулл Тукай музеена сәяхәт кылды

Өлкәннәр көне уңаеннан почта хезмәте ветераннары Яңа Кырлай авылына сәяхәткә юл тотты. Алар бөек татар шагыйре Габдулла Тукайның әдәби-мемориаль музей комплексына барып, аның тормышы һәм иҗаты белән якыннан таныштылар.

Сәяхәтнең күңелле дәвамы кафеда узды. Өстәл артында ветераннар хәл-әхвәл белешеп, бергә эшләгән еллардагы истәлекләрне яңартты, күңелле вакыйгаларны искә алды. Мондый очрашулар аралашу мөмкинлеге генә түгел, ә хезмәттәшлек елларында тупланган матур хатирәләрне саклау чарасы да булып тора.

«Бер-беребезгә сәламәтлек теләп, автобус йөртүче Русланга һәм аның җитәкчеләренә рәхмәт әйтеп таралыштык», — дип хәбәр итте безгә Наласадан почта хезмәте ветераны Әнисә апа Нәҗметдинова.

Өлкән буын вәкилләре өчен мондый сәяхәтләр мәдәни мирасыбыз белән танышу, яшьлек елларын искә төшерү һәм бер-берсе белән аралашу өчен матур мөмкинлек бирә. Почта хезмәте ветераннарына без дә ихлас рәхмәтебезне җиткерәбез, нык сәламәтлек, якыннарының җылысын тоеп, имин һәм бәхетле гомер итүләрен телибез!

Исрафил Насыйбуллин

Тулырак: https://arskmedia.ru/news/rayon-yaalyklary/pocta-xezmate-veterannary-gabdull-tukai-muzeena-saiaxat-k...